6.1

წინამდებარე განყოფილება ადგენს მოთხოვნებს პერიოდის განმავლობაში საკუთარ კაპიტალში მომხდარი ცვლილებების წარდგენისთვის საკუთარი კაპიტალის ცვლილებების ანგარიშგებაში, ან მოგებისა და ზარალის და გაუნაწილებელი მოგების ანგარიშგებაში იმ შემთხვევაში, თუ დაკმაყოფილებულია გარკვეული პირობები და საწარმო ამ უკანასკნელ მიდგომას აირჩევს.

6.2

საკუთარი კაპიტალის ცვლილებების ანგარიშგებაში წარმოდგენილია საანგარიშგებო პერიოდის მოგება ან ზარალი, საანგარიშგებო პერიოდის სხვა სრული შემოსავალი, სააღრიცხვო პოლიტიკის ცვლილებისა და შეცდომების გასწორების შედეგები, რაც აღიარებულია მოცემული პერიოდის განმავლობაში, ასევე პერიოდის განმავლობაში მესაკუთრეების მიერ მესაკუთრის რანგში განხორციელებული შენატანები, მათზე გაცემული დივიდენდები და სხვა სახის განაწილებები.

6.3

საკუთარი კაპიტალის ცვლილებების ანგარიშგება მოიცავს შემდეგ ინფორმაციას:

(ა) საანგარიშგებო პერიოდის მთლიანი სრული შემოსავალი, სათავო საწარმოს მესაკუთრეებსა და არამაკონტროლებელ წილებზე მისაკუთვნებელი მთლიანი თანხების ცალკე გამოყოფით;

(ბ) საკუთარი კაპიტალის თითოეული კომპონენტისთვის, სააღრიცხვო პოლიტიკის რეტროსპექტულად გამოყენების ან თანხების რეტროსპექტულად გადაანგარიშების შედეგები, მე10 განყოფილების - „სააღრიცხვო პოლიტიკა, შეფასებები და შეცდომები“ - შესაბამისად; და

(გ) საკუთარი კაპიტალის თითოეული კომპონენტისთვის, წლის დასაწყისსა და წლის ბოლოს არსებული საბალანსო ღირებულებების შეჯერება, სადაც ცალ-ცალკე იქნება ნაჩვენები ცვლილებები, რომლებიც გამოწვეულია:

(i) მოგების ან ზარალის ცვლილებით;

ii) სხვა სრული შემოსავლის ცვლილებით; და

(iii) მესაკუთრეების მიერ მესაკუთრის რანგში ინვესტირებული თანხებით, ან მათზე გაცემული დივიდენდებისა და სხვა სახის განაწილებით, სადაც ცალ-ცალკე იქნება ნაჩვენები აქციების გამოშვება, საწარმოს საკუთარი აქციებით განხორციელებული ოპერაციები, მესაკუთრეებზე გაცემული დივიდენდები და სხვა სახის განაწილება, ასევე შვილობილ საწარმოებში საკუთრების წილების ცვლილებები, რომლებიც არ იწვევს კონტროლის დაკარგვას.

6.4

საწარმოს მოგებისა და ზარალის და გაუნაწილებელი მოგების ანგარიშგება გვიჩვენებს პერიოდის მოგებას ან ზარალს და გაუნაწილებელ მოგებაში მომხდარ ცვლილებებს. 3.18 პუნქტით ნებადართულია ერთი, მოგებისა და ზარალის და გაუნაწილებელი მოგების ანგარიშგების წარდგენა, სრული შემოსავლის ანგარიშგებისა და საკუთარი კაპიტალის ცვლილებების ანგარიშგების ნაცვლად, თუ იმ პერიოდებში, რომლისთვისაც ფინანსური ანგარიშგებაა წარდგენილი, საკუთარი კაპიტალის ცვლილება განპირობებულია მხოლოდ მოგების ან ზარალის ცვლილებით, დივიდენდების გაცემით, წინა პერიოდების შეცდომების გასწორებითა და სააღრიცხვო პოლიტიკის ცვლილებით.

6.5

იმ ინფორმაციის გარდა, რისი წარდგენაც მოითხოვება მე-5 განყოფილებით - „სრული შემოსავლის ანგარიშგება და მოგებისა და ზარალის ანგარიშგება“, საწარმომ მოგებისა და ზარალის და გაუნაწილებელი მოგების ანგარიშგებაში დამატებით უნდა წარადგინოს შემდეგი მუხლები:

(ა) გაუნაწილებელი მოგება საანგარიშგებო პერიოდის დასაწყისისთვის;

(ბ) საანგარიშგებო პერიოდში გამოცხადებული და გაცემული, ან გადასახდელი დივიდენდები;

(გ) წინა პერიოდების შეცდომების გასწორების გათვალისწინებით კორექტირებული გაუნაწილებელი მოგება;

(დ) სააღრიცხვო პოლიტიკის ცვლილების გათვალისწინებით კორექტირებული გაუნაწილებელი მოგება; და

(ე) გაუნაწილებელი მოგება საანგარიშგებო პერიოდის ბოლოსთვის.